ವಿಟ್ಲ: ಶ್ರೀಧಾಮ ಮಾಣಿಲ ಶ್ರೀ ಮಹಾಲಕ್ಷ್ಮೀ ಕ್ಷೇತ್ರದಲ್ಲಿ ಶ್ರೀ ಮಹಾಲಕ್ಷ್ಮೀ, ವಿಠೋಭ ರುಕ್ಮಯಿ, ನಾಗದೇವರ ಪ್ರತಿಷ್ಠಾ ವರ್ಧಂತ್ಯುತ್ಸವ ಫೆ.25ರಂದು ನಡೆಯಿತು.
ಧಾರ್ಮಿಕ ಸಭೆಯಲ್ಲಿ ಆಶೀರ್ವಚನ ನೀಡಿದ ಮಾಣಿಲ ಶ್ರೀ ಗಳು, ಧರ್ಮವನ್ನು ಅರ್ಥಮಾಡುವ ಮನಸ್ಸು ನಮ್ಮದಾಗಬೇಕು. ಸಮಾಜದಲ್ಲಿ ಒಗ್ಗಟ್ಟಿನ ಅವಶ್ಯಕತೆಯಿದೆ. ನಮ್ಮ ಬದಲಾವಣೆಗೆ ನಾವೆ ಕಾರಣಕರ್ತರು. ಭಗವಂತನ ಸೃಷ್ಠಿಯಲ್ಲಿ ಭೇದವಿಲ್ಲ ಎಂದರು.
ವಸ್ತ್ರ ಸಂಹಿತೆಗೆ ಅದರದ್ದೇ ಆದ ಮಹತ್ವವಿದೆ. ಆ ವಿಚಾರದಲ್ಲಿ ಗೊಂದಲ ಸೃಷ್ಠಿಸುವ ಕೆಲಸವಾಗುತ್ತಿದೆ. ನೈತಿಕ ಶಿಕ್ಷಣವನ್ನು ನೀಡುವ ಕೆಲಸ ಎಲ್ಲರಿಂದಾಗಬೇಕು. ಸಂಸ್ಕಾರಗಳು ಕಡಿಮೆಯಾದಾಗ ಸಮಾಜದಲ್ಲಿ ಹಲವಾರು ಸಮಸ್ಯೆಗಳು ಉದ್ಭವಿಸುತ್ತದೆ. ಭಕ್ತಿ ಮಾರ್ಗದ ಮೂಲಕ ಧರ್ಮ ಜಾಗೃತಿ ಸಾಧ್ಯ. ಭಕ್ತಿಯ ಶಿಕ್ಷಣ, ಸಂಸ್ಕಾರ ಶಿಕ್ಷಣ, ಮಕ್ಕಳ ಉಜ್ವಲ ಭವಿಷ್ಯಕ್ಕೆ ಕಾರಣವಾಗುತ್ತದೆ ಎಂದರು.
ಶ್ರೀಕ್ಷೇತ್ರ ಕಟೀಲಿನ ಅರ್ಚಕರಾದ ಕಮಲಾದೇವಿ ಪ್ರಸಾದ ಅಸ್ರಣ್ಣರವರು ಮಾತನಾಡಿ, ನಮ್ಮಲ್ಲಿ ಸಭ್ಯತೆಯನ್ನು ಮೂಡಿಸಲು ಧಾರ್ಮಿಕ‌ಸಭೆಗಳು ಅಗತ್ಯ. ಸಂಸ್ಕಾರಗಳು ಸ್ಥಾಯಿಯಾಗಿ ಉಳಿಯಲು ಇಂತಹ ಸಭೆಗಳು ಅತೀ ಮುಖ್ಯ. ಆಳುವವರಲ್ಲಿ ಧರ್ಮ ಪ್ರಜ್ಞೆ ಇದ್ದಾಗ ಉತ್ತಮ ಸಮಾಜ ನಿರ್ಮಾಣವಾಗಲು ಸಾಧ್ಯ. ಧರ್ಮವಿಲ್ಲದಿದ್ದರೆ ರಕ್ಷಣೆಯಿಲ್ಲ. ಭಜನೆಯಿಂದ ಸಮಾಜದ ಉದ್ದಾರ ಸಾಧ್ಯ. ದೇಶ ಪ್ರೀತಿ ದೇವ ಭಕ್ತಿ ಉಳಿಸಿಕೊಂಡು ದುರ್ವ್ಯಸನ ಬ್ರಷ್ಠಾಚಾರವನ್ನು ಬಿಟ್ಟುಬಿಡಿ. ಎಲ್ಲರೂ ಒಂದಾಗಿ ಬ್ರಷ್ಟಾಚಾರ ತೊಲಗಿಸಲು ಪಣತೊಡಬೇಕು ಎಂದರು.
ಶ್ರೀ ಕ್ಷೇತ್ರ ಧರ್ಮಸ್ಥಳದ ಬುಜಬಲಿ ಧರ್ಮಸ್ಥಳ, ಮುಂಬೈ ಯ ಉದ್ಯಮಿ ಬಾಸ್ಕರ ಶೆಟ್ಟಿ ಪುಣೆ,ಬೆಂಗಳೂರಿನ ವೈದ್ಯರಾದ ಡಾ. ಜಿತೇಂದ್ರ ರೇವಣ್ಕರ್, ಬೆಂಗಳೂರು ಕುಲಾಲ ಸಂಘದ ಅಧ್ಯಕ್ಷ ಪುರುಷೋತ್ತಮ ಚೇಂಡ್ಲ ಬೆಂಗಳೂರು, ಟ್ರಸ್ಟಿಗಳಾದ ಜಯರಾಜ್ ಪ್ರಕಾಶ್, ಚಂದ್ರಶೇಖರ ಮೂಲ್ಯ ಮಂಗಳೂರು, ಮಹಿಳಾ ಸಮಿತಿ ಅಧ್ಯಕ್ಷೆ ವನಿತಾ ವಿ. ಶೆಟ್ಟಿ ಮೊದಲಾದವರು ವೇದಿಕೆಯಲ್ಲಿ ಉಪಸ್ಥಿತರಿದ್ದರು. ಟ್ರಸ್ಟಿ ತಾರನಾಥ ಕೊಟ್ಟಾರಿ ಸ್ವಾಗತಿಸಿ ಕಾರ್ಯಕ್ರಮ ನಿರೂಪಿಸಿದರು. ಟ್ರಸ್ಟಿ ಮಚ್ಚೇಂದ್ರನಾಥ ಸಾಲ್ಯಾನ್ ವಂದನಾರ್ಪಣೆಗೈದರು.
