ಬೆಳ್ತಂಗಡಿ: ಚಿಕಿತ್ಸೆಗೆಂದು ಆಸ್ಪತ್ರೆಗೆ ದಾಖಲಿಸಲಾದ ಧರ್ಮಸ್ಥಳದ ಕೂಲಿ ಕಾರ್ಮಿಕರೊಬ್ಬರು ಮೃತ ಪಟ್ಟಿದ್ದು, ಅವರಿಗೆ ಸ್ಥಳೀಯ ರಾಜಕೀಯ ಮುಖಂಡರೋರ್ವರು ಮಾರಣಾಂತಿಕವಾಗಿ ಹಲ್ಲೆ ನಡೆಸಿದ ಕಾರಣ ಮೃತಪಟ್ಟಿದ್ದಾರೆಂದು ಧರ್ಮಸ್ಥಳ ಠಾಣೆಗೆ ಮೃತರ ತಾಯಿ ದೂರು ನೀಡಿದ್ದು, ಈ ಹಿನ್ನೆಲೆ ಠಾಣೆಯಲ್ಲಿ ಕೊಲೆ ಪ್ರಕರಣ ದಾಖಲಿಸಲಾಗಿದೆ.
ಮೃತರನ್ನು ಬೆಳ್ತಂಗಡಿಯ ತಾಲೂಕಿನ ಕನ್ಯಾಡಿ ನಿವಾಸಿ ಕೂಲಿಕಾರ್ಮಿಕ ದಿನೇಶ್ ನಾಯ್ಕ್ ಎನ್ನಲಾಗಿದೆ.
ಕೃಷ್ಣ ಎಂಬವರು ಈ ಕೊಲೆ ಮಾಡಿದ್ದಾರೆ ಎಂದು ಮೃತ ದಿನೇಶ್ ನಾಯ್ಕ್ ತಾಯಿ ಪದ್ಮಾವತಿ ದೂರಿನಲ್ಲಿ ತಿಳಿಸಿದ್ದಾರೆ.
ಕೃಷ್ಣ (ಶಂಕಿತ) ವಿರುದ್ದ ಐಪಿಸಿ ಸೆಕ್ಷನ್ 302ರಂತೆ ಕೊಲೆ ಪ್ರಕರಣ ದಾಖಲಾಗಿದೆ.
ರಾಮ ಮಂದಿರದ ಮುಂಭಾಗದಲ್ಲಿ ಅಂಗಡಿ ಹೊಂದಿದಿರುವ ಕೃಷ್ಣ ಎಂಬವರು ಜಾಗದ ದಾಖಲಾತಿ ಮಾಡಿಕೊಟ್ಟ ವಿಚಾರವನ್ನು ಸಾರ್ವಜನಿಕವಾಗಿ ಹೇಳಿದ್ದೇನೆಂದು ಕೋಪಗೊಂಡು ನನ್ನ ಮೇಲೆ ಮಾರಣಾಂತಿಕವಾಗಿ ಹಲ್ಲೆ ಮಾಡಿದ್ದಾನೆಂದು ಫೆ. 23 ರಂದು ದಿನೇಶ್ ತನ್ನ ತಾಯಿ ಪದ್ಮಾವತಿ (ದೂರುದಾರೆ) ಹಾಗೂ ತನ್ನ ಪತ್ನಿ ಕವಿತಾರವರ ಬಳಿ ಬಂದು ಹೇಳಿರುವುದಾಗಿ ಆರೋಪಿಸಲಾಗಿದೆ. ಆ ಬಳಿಕ ತೀವ್ರ ಅಸ್ವಸ್ಥಗೊಂಡಿದ್ದ ದಿನೇಶ್ ಮನೆಯಲ್ಲಿಯೇ ನೋವಿನಿಂದ ನರಳಾಡುತ್ತಿದ್ದರು. ದಿನೇಶ್ ಮನೆಯವರು ತೀರ ಬಡ ಕುಟುಂಬದವರಾಗಿದ್ದು ಹೀಗಾಗಿ ತಮಗೆ ಆತನನ್ನು ಆಸ್ಪತ್ರೆಗೆ ಸಾಗಿಸಲು ಸಾಧ್ಯವಾಗಿಲ್ಲ ಎಂದು ತಿಳಿಸಿದ್ದಾರೆ. ಮರು ದಿನ ಬೆಳಿಗ್ಗೆ ದಿನೇಶ್ ಪತ್ನಿ ಕವಿತಾರವರು ಕೃಷ್ಣರವರ ಬಳಿ ನಿನ್ನೆ ನೀವು ಹಲ್ಲೆ ನಡೆಸಿದರಿಂದ ನನ್ನ ಪತಿ ತೀವ್ರ ಅಸ್ವಸ್ಥಗೊಂಡಿರುವುದಾಗಿಯೂ , ಕೂಡಲೇ ಅವರನ್ನು ಆಸ್ಪತ್ರೆಗೆ ಸೇರಿಸುವಂತೆಯೂ ಒತ್ತಾಯಿಸಿದ್ದಾರೆ ಅದರಂತೆ ಗಂಭೀರ ಗಾಯಗೊಂಡ ದಿನೇಶ್ ರನ್ನು ಮನೆಯವರು ಹಾಗೂ ಕೃಷ್ಣ ಅವರೇ ಮಂಗಳೂರಿನ ವೆನ್ಲಾಕ್ ಆಸ್ಪತ್ರೆಗೆ ಸೇರಿಸಿದ್ದಾರೆ.
ತನ್ನ ತಪ್ಪನ್ನು ಮರೆಮಾಚುವ ಉದ್ದೇಶದಿಂದ ಹಾಗೂ ಕಾನೂನಿನ ಕುಣಿಕೆಯಿಂದ ತಪ್ಪಿಸಿಕೊಳ್ಳುವ ಉದ್ದೇಶದಿಂದ ದಿನೇಶ್ ರವರು ಮೆಟ್ಟಿಲಿನಿಂದ ಬಿದ್ದು ಗಾಯಗೊಂಡಿರುವುದಾಗಿ ಅಸ್ಪತ್ರೆಯಲ್ಲಿ ಕೃಷ್ಣ ರವರು ತಿಳಿಸಿದ್ದಾರೆ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ.
ಫೆ.24 ರಂದು ಚಿಕಿತ್ಸೆ ಫಲಕಾರಿಯಾಗದೇ ದಿನೇಶ್ ಮೃತಪಟ್ಟಿದ್ದು, ದಿನೇಶ್ ರವರ ತಾಯಿ ಕೃಷ್ಣ ರವರು ಹಲ್ಲೆ ಮಾಡಿದ್ದರಿಂದಲೇ ದಿನೇಶ್ ಮೃತ ಪಟ್ಟಿದ್ದಾನೆ ಅವರ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳುವಂತೆ ದೂರಿನಲ್ಲಿ ತಿಳಿಸಿದ್ದಾರೆ.
