ರಾಜ್ಯ ಸರ್ಕಾರದ ಅಂಕಿ ಅಂಶಗಳ ಪ್ರಕಾರ ಕಳೆದ ಐದು ವರ್ಷಗಳಲ್ಲಿ ರಾಜ್ಯದಲ್ಲಿ ನಡೆದ ಕೋಮು ಗಲಭೆ ಆಧಾರಿತ 242 ಪ್ರಕರಣಗಳು ದಾಖಲಾಗಿದ್ದು, ಈ ಪೈಕಿ ಶಿವಮೊಗ್ಗದ ಜಿಲ್ಲೆಯಲ್ಲಿ 57 ಪ್ರಕರಣಗಳು ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ 46 ಪ್ರಕರಣಗಳು ದಾಖಲಾಗಿವೆ. ಈ ಮೂಲಕ ಮತೀಯ ಗಲಭೆಯಗಳಲ್ಲಿ ಈ ಎರಡು ಜಿಲ್ಲೆಗಳು ಅಗ್ರಸ್ಥಾನವನ್ನು ಪಡೆದುಕೊಂಡಿವೆ. ಉಳಿದಂತೆ ಬಾಗಲಕೋಟೆಯಲ್ಲಿ 26, ದಾವಣಗೆರೆ 18, ಹಾವೇರಿ 18 ಪ್ರಕರಣಗಳ ದಾಖಲಾದರೆ ಕಲಬುರಗಿ, ರಾಮನಗರ, ಮಂಡ್ಯ, ಉತ್ತರ ಕನ್ನಡ, ಕೊಪ್ಪಳ ಜಿಲ್ಲೆಗಳು ಮತೀಯ ಪ್ರಕರಣಗಳಿಂದ ದೂರ ಉಳಿದಿವೆ.
ರೌಡಿಸಂನಲ್ಲಿ ಉಡುಪಿ, ಕೋಲಾರ ಮುಂದು
ಇದೊಂದು ಕಡೆಯಾದರೆ, ಮತ್ತೊಂದೆಡೆಯಲ್ಲಿ ರೌಡಿಸಂನಲ್ಲಿ ಉಡುಪಿ, ಕೋಲಾರ ಅಗ್ರಸ್ಥಾನ ಪಡೆದಿದ್ದು, ಈ ಜಿಲ್ಲೆಗಳಲ್ಲಿ ಅತಿ ಹೆಚ್ಚು ರೌಡಿಸಂ ಆಧಾರಿತ ಪ್ರಕರಣಗಳು ದಾಖಲಾಗಿವೆ. ಉಡುಪಿ ಜಿಲ್ಲೆಯಲ್ಲಿ ಕಳೆದ ಐದು ವರ್ಷದಲ್ಲಿ 431 ಪ್ರಕರಣಗಳು ದಾಖಲಾದರೆ, ಕೋಲಾರದಲ್ಲಿ165, ದಕ್ಷಿಣ ಕನ್ನಡ 152 ಪ್ರಕರಣಗಳು ದಾಖಲಾಗಿವೆ. ಇನ್ನು, ಬೆಂಗಳೂರು ನಗರ 60, ಕಲಬುರಗಿ 97,ಶಿವಮೊಗ್ಗದಲ್ಲಿ 156 ಪ್ರಕರಣಗಳು ದಾಖಲುಗೊಂಡಿವೆ.
ಮೂರು ವರ್ಷಗಳಲ್ಲಿ 4 ಮತೀಯ ಕೊಲೆ
ಇನ್ನು ರಾಜ್ಯದಲ್ಲಿ ಕಳೆದ ಮೂರು ವರ್ಷಗಳಲ್ಲಿ ನಾಲ್ಕು ಮತೀಯ ಆಧಾರಿತ ಕೊಲೆ ಪ್ರಕರಣಗಳು ನಡೆದಿವೆ. ಮಂಗಳೂರು ನಗರದಲ್ಲಿ 1, ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ 1 ಗದಗ ( ನರಗುಂದ)ದಲ್ಲಿ 1 ಹಾಗೂ ಶಿವಮೊಗ್ಗದಲ್ಲಿ 1 ಪ್ರಕರಣಗಳು ನಡೆದಿವೆ. ಕೋಮು ಸಂಘರ್ಷದಲ್ಲಿ ಹಾನಿ ಸಂಬಂಧಿಸಿದಂತೆ ಶಿವಮೊಗ್ಗದಲ್ಲಿ 31 ಪ್ರಕರಣಗಳು ವರದಿಯಾಗಿವೆ.
ಗಲಭೆಯಲ್ಲಿ 380 ಪೊಲೀಸರಿಗೂ ದೈಹಿಕ ಹಾನಿ
ಇನ್ನು ಗಲಭೆ, ಕೋಮು ಸಂಘರ್ಷಗಳನ್ನು ನಿಯಂತ್ರಣ ಮಾಡಬೇಕಾದ ಪೊಲೀಸರಿಗೆ ಈ ಸಂದರ್ಭಗಳು ನಿಜಕ್ಕೂ ಸವಾಲಾಗಿವೆ. ಗುಂಪು ಘರ್ಷಣೆಗಳನ್ನು ನಿಯಂತ್ರಣ ಮಾಡುವ ಸಂದರ್ಭದಲ್ಲಿ ಪೊಲೀಸರಿಗೂ ದೈಹಿಕವಾಗಿ ಹಲ್ಲೆಗಳಾಗಿದ್ದು, ರಾಜ್ಯದಲ್ಲಿ ಕಳೆದ ಐದು ವರ್ಷಗಳಲ್ಲಿ ಅಧಿಕಾರಿಗಳು ಒಳಗೊಂಡಂತೆ 380 ಪೊಲೀಸರು ದೈಹಿಕವಾಗಿ ಹಾನಿಗೊಳಗಾಗಿದ್ದಾರೆ.
ಈ ಸಂಬಂಧ 2017 ರಲ್ಲಿ 27 ಪ್ರಕರಣ, 2018 – 15, 2019 – 36, 2020 -23, 2021 – 20 2022- 20 ಪ್ರಕರಣಗಳು ದಾಖಲಾಗಿವೆ. ಪೊಲೀಸ್ ಅಧಿಕಾರಿಗಳು 107, ಸಬ್ ಇನ್ಸ್ ಸ್ಪೆಕ್ಟರ್ – 49 ಹೆಡ್ ಕಾನ್ಸ್ಟೇಬಲ್- 96ಹಾಗೂ ಕಾನ್ಸ್ ಟೇಬಲ್ 128 ಮಂದಿ ದೈಹಿಕವಾಗಿ ಹಲ್ಲೆಗೊಳಗಾಗಿದ್ದಾರೆ. ಪೊಲೀಸರ ಮೇಲೆ ನಡೆದ ಹಲ್ಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಈವರಗೆ 3,489 ಆರೋಪಿಗಳ ವಿರುದ್ಧ ಕಾನೂನು ಕ್ರಮ ಜರಗಿಸಲಾಗಿದೆ. ಈ ಪೈಕಿ ಉತ್ತರ ಕನ್ನಡ ಜಿಲ್ಲೆಯಲ್ಲಿ 802, ದಾವಣಗೆರೆಯಲ್ಲಿ 465, ಮಂಗಳೂರಿನಲ್ಲಿ 501 ಹಾಗೂ ಬೆಂಗಳೂರು ನಗರದಲ್ಲಿ 493 ಆರೋಪಿಗಳ ವಿರುದ್ಧ ಕ್ರಮ ಕೈಗೊಳ್ಳಲಾಗಿದೆ.
ಇನ್ನು ಕೋಮುಗಲಭೆಗಳನ್ನು ನಿಯಂತ್ರಣ ಮಾಡುವ ನಿಟ್ಟಿನಲ್ಲಿ ರಾಜ್ಯ ಸರ್ಕಾರ ಹಾಗೂ ಪೊಲೀಸ್ ಇಲಾಖೆ ಹಲವು ಮುಂಜಾಗರೂಕತಾ ಕ್ರಮಗಳನ್ನು ಕೈಗೊಂಡಿದೆ ಎಂದು ಹೇಳುತ್ತಿದೆ. ಆದರೆ ಮತೀಯ ಆಧಾರಿತ ಗಲಭೆಗಳಿಗೆ ಬ್ರೇಕ್ ಬೀಳುತ್ತಿಲ್ಲ. ಇನ್ನೇನು ವಿಧಾನಸಭೆ ಚುನಾವಣೆ ರಾಜ್ಯದಲ್ಲಿ ನಡೆಯಲಿದೆ. ಇಂತಹ ಸಂದರ್ಭದಲ್ಲಿ ಧರ್ಮದ ಆಧಾರಿತವಾಗಿ ಗಲಭೆಗಳು ನಡೆಯುವ ಆತಂಕವೂ ಎದುರಾಗಿದೆ. ಈ ನಿಟ್ಟಿನಲ್ಲಿ ಪೊಲೀಸ್ ಇಲಾಖೆಯೂ ಮುಂಜಾಗರೂಕತಾ ಕ್ರಮಗಳನ್ನು ಕೈಗೊಳ್ಳಬೇಕಾದ ಅಗತ್ಯವಿದೆ.
