ಚಿಕ್ಕೋಡಿ : ಈಗಂತೂ ಸಾಕಷ್ಟು ಯುವಕ ಹಾಗೂ ಯುವತಿಯರು ತನ್ನ ರೀಲ್ಸ್ಗೆ ಹೆಚ್ಚಿನ ಲೈಕ್ಸ್ ಹಾಗೂ ವೀವ್ಸ್ಗಳು ಬರಲಿ ಅಂತ ಏನೇನೋ ಸರ್ಕಸ್ ಮಾಡುತ್ತಾರೆ. ಹೀಗೆ ಯುವಕನೊಬ್ಬ ಅಥಣಿ ಬಸ್ ನಿಲ್ದಾಣದಲ್ಲಿ ಹುಚ್ಚಾಟ ಮೆರೆದಿದ್ದಾನೆ.
ಅಥಣಿ ತಾಲೂಕಿನ ಶಿನಾಳ ಗ್ರಾಮದ ಯುವಕ ಬಾಳೇಶ ದುರ್ಗಿಗೆ ರೀಲ್ಸ್ ಮಾಡೋ ಹುಚ್ಚಿತ್ತು. ಹೀಗಾಗಿ ಸಿಕ್ಕ ಸಿಕ್ಕಲ್ಲಿ ರೀಲ್ಸ್ ಮಾಡುತ್ತಾ ಕಾಲ ಕಳೆಯುತ್ತಿದ್ದ ಈತನ ಹುಚ್ಚಾಟಕ್ಕೆ ಸಾರ್ವಜನಿಕರು ಬೇಸತ್ತು ಹೋಗಿದ್ದರು. ಹೀಗೆ ಬಾಳೇಶ ದುರ್ಗಿ ಸಾಕಷ್ಟು ಜನ ಯುವತಿಯರ ಮುಂದೆ ಬಟ್ಟೆ ಬಿಚ್ಚಿ ಸಿಕ್ಸ್ ಪ್ಯಾಕ್ ಶೋ ಕೊಡಲು ಹೋಗಿದ್ದಾನೆ.
ಈ ವೀಡಿಯೋವನ್ನು ತನ್ನ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಶೇರ್ ಮಾಡಿಕೊಂಡಿದ್ದಾನೆ. ಶೇರ್ ಮಾಡಿಕೊಂಡ ವೀಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗಿದೆ. ವಿದ್ಯಾರ್ಥಿನಿಯ ಮುಂದೆ ಪೋಸ್ ಕೊಟ್ಟು ರೀಲ್ಸ್ ಮಾಡಿ ಶೋಕಿ ಮಾಡುತ್ತಿದ್ದವನನ್ನು ಅಥಣಿ ಪೊಲೀಸರು ಬೆಂಡೆತ್ತಿದ್ದಾರೆ. ಬಳಿಕ ಅದೇ ಯುವಕ ವೀಡಿಯೋ ಮಾಡಿ ಯಾರು ಸಹ ನನ್ನ ತರ ಮಾಡಬೇಡಿ ಎಂದು ಮನವಿ ಮಾಡಿಕೊಂಡಿದ್ದಾನೆ.
ವೈರಲ್ ಆದ ವೀಡಿಯೋದಲ್ಲಿ ಏನಿದೆ?
ನಾನು ಅಥಣಿ ತಾಲೂಕಿನ ಬಾಳೇಶ ದುರ್ಗಿ ಮಾತಾಡುತ್ತಿದ್ದೇನೆ. ನಾನು ಅಥಣಿ ಬಸ್ ನಿಲ್ದಾಣದಲ್ಲಿ ಹುಡುಗಿಯರು ನೋಡಲಿ ಅಂತ ವೀಡಿಯೋ ಮಾಡಿ ಬಿಟ್ಟಿದೆ. ನನ್ನಿಂದ ತಪ್ಪಾಗಿದೆ. ನೀವು ಯಾರು ನನ್ನ ರೀತಿಯಲ್ಲಿ ವೀಡಿಯೋ ಮಾಡಬೇಡಿ ಅಂತ ಯುವಕ ಮನವಿ ಮಾಡಿಕೊಂಡಿದ್ದಾನೆ.
