ಪುತ್ತೂರು : ರಾಜ್ಯದ ನಗರ ಸಭೆ ಮತ್ತು ಪಟ್ಟಣ ಪಂಚಾಯತ್ ಗಳ ಅಧ್ಯಕ್ಷ ಹಾಗೂ ಉಪಾಧ್ಯಕ್ಷರ ಆಯ್ಕೆಗೆ ಮೀಸಲಾತಿಗೆ ಸಂಬಂಧಿಸಿ ಜು.12 ರಂದು ರಾಜ್ಯ ಸರಕಾರ ಕರಡು ಅಧಿಸೂಚನೆ ಪ್ರಕಟಿಸಿದ್ದು, ಆಕ್ಷೇಪಣೆಗಳನ್ನು ಸಲ್ಲಿಸಲು 15 ದಿನಗಳ ಕಾಲಾವಕಾಶ ನೀಡಿದೆ.
ಪುತ್ತೂರು ಸಹಿತ ರಾಜ್ಯದ 61 ನಗರಸಭೆ, 123 ಪುರಸಭೆ ಹಾಗೂ ವಿಟ್ಲ ಸೇರಿದಂತೆ 117 ಪಟ್ಟಣ ಪಂಚಾಯತ್‌ಗಳ ಅಧ್ಯಕ್ಷ ಹಾಗೂ ಉಪಾಧ್ಯಕ್ಷ ಸ್ಥಾನಗಳಿಗೆ ಹಂಚಿಕೆಯಾಗುವ ಮೀಸಲಾತಿಯನ್ನು ಪ್ರಕಟಿಸಲಾಗಿದೆ.
ಪಟ್ಟಣ ಪಂಚಾಯತ್ ಗಳ ಅಧ್ಯಕ್ಷ ಹಾಗೂ ಉಪಾಧ್ಯಕ್ಷ ಸ್ಥಾನಗಳಿಗೆ ಪರಿಶಿಷ್ಟ ಜಾತಿ 10, ಪರಿಶಿಷ್ಟಜಾತಿ ಮಹಿಳೆ ತಲಾ 10, ಪರಿಶಿಷ್ಟ ಪಂಗಡ 4, ಪರಿಶಿಷ್ಟ ಪಂಗಡ ಮಹಿಳೆ 4, ಒಬಿಸಿಎ-12, ಒಬಿಸಿ-ಎ ಮಹಿಳೆ 12, ಒಬಿಸಿಬಿ-3, ಒಬಿಸಿಬಿ ಮಹಿಳೆ- 3, ಸಾಮಾನ್ಯ 30 ಹಾಗೂ ಸಾಮಾನ್ಯ ಮಹಿಳೆ 29 ಸ್ಥಾನಗಳನ್ನು ಮೀಸಲಿರಿಸಲಾಗುತ್ತದೆ. ಯಾವುದೇ ಸ್ಥಳೀಯಾಡಳಿತದಲ್ಲಿ ಆಕ್ಷೇಪಣೆ ಗಳು ಸ್ವೀಕೃತವಾದಲ್ಲಿ ಪರಿಶೀಲಿಸಿ ಸರಕಾರಕ್ಕೆ ವರದಿ ಸಲ್ಲಿಸುವಂತೆ ನಗರಾಭಿವೃದ್ಧಿ ಇಲಾಖೆಯ ಅಧೀನ ಕಾರ್ಯದರ್ಶಿ ಟಿ. ಮಂಜುನಾಥ ರವರು ಆದೇಶದಲ್ಲಿ ಸೂಚಿಸಿದ್ದಾರೆ.
