ಬೆಳ್ತಂಗಡಿ: ಅಪ್ರಾಪ್ತ ಶಾಲಾ ಬಾಲಕಿಯ ಮೇಲೆ ಇಬ್ಬರು ಅತ್ಯಾಚಾರ ನಡೆಸಿ ಆಕೆಯನ್ನು ಗರ್ಭಿಣಿಯಾಗಿಸಿದ ಘಟನೆ ಬೆಳ್ತಂಗಡಿಯಲ್ಲಿ ನಡೆದಿದ್ದು, ಬಾಲಕಿಯ ದೂರಿನಂತೆ ಬೆಳ್ತಂಗಡಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಅತ್ಯಾಚಾರವೆಸಗಿದ ಆರೋಪಿಗಳನ್ನು ರವೀಂದ್ರ ಹಾಗೂ ಯೋಗೀಶ ಎನ್ನಲಾಗಿದೆ.
ಜೆಸಿಬಿ ಚಾಲಕ ರವೀಂದ್ರ ಎಂಬವರು ಪರಿಚಯವಾಗಿ ಸಲುಗೆಯಿಂದ ಇದ್ದು ಬಳಿಕ ಹಲವು ಬಾರಿ ತನ್ನ ಇಚ್ಛೆಗೆ ವಿರುದ್ಧವಾಗಿ ವಿವಿಧ ಸ್ಥಳಗಳಲ್ಲಿ ಲೈಂಗಿಕ ಸಂಪರ್ಕ ನಡೆಸಿದ್ದು, ಇದನ್ನು ಯಾರಲ್ಲಿಯೂ ತಿಳಿಸಬಾರದಾಗಿ ತನಗೆ ಹೇಳಿ ನಂತರ ಸಂಪರ್ಕಕ್ಕೆ ಸಿಗದೇಯಿದ್ದು, ರವೀಂದ್ರ ತನ್ನ ಮೇಲೆ ಅತ್ಯಾಚಾರ ಎಸಗುವ ಮೊದಲು 2020ನೇ ಏಪ್ರಿಲ್ ತಿಂಗಳಿನಲ್ಲಿ ತನ್ನ ಸಂಬಂಧಿಯಾದ ಕೊಕ್ರಾಡಿ ಯೋಗೀಶ್ ತನ್ನನ್ನು ಸವಣಾಲು ಗ್ರಾಮದ ಕಾಡುಪ್ರದೇಶಕ್ಕೆ 2 ಬಾರಿ ಕರೆದುಕೊಂಡು ಹೋಗಿ ತನ್ನ ಇಚ್ಛೆಗೆ ವಿರುದ್ಧವಾಗಿ ಬಲತ್ಕಾರವಾಗಿ ದೈಹಿಕ ಸಂಭೋಗ ನಡೆಸಿ ತನ್ನ ಸಂಪರ್ಕದಿಂದ ದೂರವಾಗಿದ್ದಾರೆ ಎಂದು ಯುವತಿ ತಿಳಿಸಿದ್ದಾಳೆ.
ಲಾಕ್ ಡೌನ್ ನಂತರ ಶಾಲೆಗೆ ಹೋದಾಗ ಸೆ.23 ರಂದು ಇಂಜೆಕ್ಷನ್ ಕೊಡಲೆಂದು ಬಂದ ವೈದ್ಯರು ಯುವತಿಯ ದೇಹಸ್ಥಿತಿಯನ್ನು ನೋಡಿ ಪರೀಕ್ಷಿಸಲು ತಿಳಿಸಿದ್ದು, ಸೆ.27 ರಂದು ಬೆಳ್ತಂಗಡಿಯಲ್ಲಿ ವೈದ್ಯರಲ್ಲಿ ಪರೀಕ್ಷಿಸಿದಾಗ 7 ತಿಂಗಳ ಗರ್ಭಿಣಿಯಾಗಿರುವುದೆಂದು ತಿಳಿಸಿದ್ದು, ತನ್ನ ಮೇಲೆ ಬಲತ್ಕಾರವಾಗಿ ಅತ್ಯಾಚಾರವೆಸಗಿ ಗರ್ಭಿಣಿಯನ್ನಾಗಿ ಮಾಡಿದ ರವೀಂದ್ರ ಮತ್ತು ಯೋಗಿಶ್ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳುವಂತೆ ಯುವತಿ ಠಾಣೆಗೆ ದೂರು ನೀಡಿದ್ದಾಳೆ.
ಈ ಬಗ್ಗೆ ಬೆಳ್ತಂಗಡಿ ಪೊಲೀಸ್ ಠಾಣೆಯಲ್ಲಿ ಅ.ಕ್ರ. 80/201 ಕಲಂ.376 ಜೊತೆಗೆ 34 ಐಪಿಸಿ ಮತ್ತು ಕಲಂ 5,6 ಫೋಕ್ಸೋ ಕಾಯ್ದೆಯಂತೆ ಪ್ರಕರಣ ದಾಖಲಾಗಿದೆ. ಆರೋಪಿಗಳಿಗಾಗಿ ಪೊಲೀಸರು ಹುಡುಕಾಟ ನಡೆಸುತ್ತಿದ್ದಾರೆ.
