ಪುತ್ತೂರು: ಮದುವೆ ಆಗುವುದಾಗಿ ನಂಬಿಸಿ ವಂಚಿಸಿದ ಪ್ರಕರಣದ ಆರೋಪಿ ಪುತ್ತೂರಿನ ಎರಡನೇ ಹೆಚ್ಚುವರಿ ಸಿವಿಲ್‌ ಜಡ್ಜ್‌ ಮತ್ತು ಜೆಎಂಎಫ್‌ಸಿ ನ್ಯಾಯಾಲಯ ದೋಷಮುಕ್ತಗೊಳಿಸಿ ತೀರ್ಪು ನೀಡಿದೆ.
8 ವರ್ಷಗಳ ಹಿಂದೆ ಕಡಬ ತಾಲೂಕಿನ ಕುಟ್ರುಪ್ಪಾಡಿ ಗ್ರಾಮದ ಪ್ರದೀಪ್‌ ಎಂಬಾತ, ಸುಮಿತ್ರ ಎಂಬುವರನ್ನು ಮದುವೆಯಾಗುವುದಾಗಿ ನಂಬಿಸಿ ವಂಚಿಸಿದ್ದ ಪ್ರಕರಣ ಇದಾಗಿದೆ. ಪ್ರಕರಣದ ಮೊದಲನೇ ಆರೋಪಿ ಪ್ರದೀಪ್‌ ಅವರು ಇತರ ಆರೋಪಿಗಳಾದ ಅಣ್ಣ ಪ್ರಸಾದ್‌ ಪಿ. ಕೆ., ತಾಯಿ ರುಕ್ಮಿಣಿ ಹಾಗೂ ಬಾವ ಶಿಬು ಅವರು 2012ರ ಡಿಸೆಂಬರ್ 27 ರಂದು ಸುಮಿತ್ರ ಅವರ ಮನೆಗೆ ಬಂದು ಸುಮಾರು 200 ಜನರ ಮುಂದೆ ಉಂಗುರ ಬದಲಾಯಿಸಿ ನಿಶ್ಚಿತಾರ್ಥ ನಡೆಸಿ ವಿವಾಹವನ್ನು ಕೊಲ್ಲೂರು ಮೂಕಾಂಬಿಕಾ ದೇವಳದಲ್ಲಿ 2013 ರ ಮೇ 12 ರಂದು ನಡೆಸುವುದಾಗಿ ನಿರ್ಧರಿಸಿದ್ದರು. ಅದರಂತೆ ಸುಮಿತ್ರ ಮತ್ತು ಅವರ ಮನೆಯವರು ಮದುವೆ ಆಮಂತ್ರಣ ಪತ್ರಿಕೆಯನ್ನು ಮುದ್ರಿಸಿ ಸಂಬಂಧಿಕರಿಗೆ ಹಾಗೂ ನೆರೆಕರೆಯವರಿಗೆ ಹಂಚಿದ್ದರು. ಆ ಬಳಿಕ ಏಕಾಏಕಿ ಆರೋಪಿಗಳು ಮದುವೆಗೆ ಒಪ್ಪದೇ ಸುಮಿತ್ರ ಮತ್ತು ಅವರ ಮನೆಯವರಿಗೆ ಸರಿಯಾಗಿ ಮಾತುಕತೆಗೂ ಸಿಕ್ಕಿರಲಿಲ್ಲ.
ಆರೋಪಿ ಪ್ರದೀಪ್‌ ತಾನು ಕೆಲಸ ಮಾಡುತ್ತಿದ್ದ ಕಂಪನಿಯೊಂದರಿಂದ ಮಂಗಳೂರಿನಿಂದ ಬೆಂಗಳೂರಿಗೆ ವರ್ಗಾವಣೆ ಪಡೆದು ಹೋಗಿದ್ದನು.
ಈ ವೇಳೆ ಹುಡುಗನ ಕಡೆಯವರು ಪ್ರದೀಪ್‌ನನ್ನು ಸುಮಿತ್ರ ಅವರ ಜೊತೆ ಮದುವೆ ಮಾಡಿಕೊಡುವುದಾಗಿ ನಂಬಿಸಿ ಆ ಬಳಿಕ ಮದುವೆಯಾಗದೇ ಮದುವೆಗೆ ನಿರಾಕರಿಸಿ ಮೋಸ ಮಾಡಿದ್ದಾರೆ ಎಂದು ಕಡಬ ಪೊಲೀಸ್‌ ಠಾಣೆಯಲ್ಲಿ ಸುಮಿತ್ರ ದೂರು ನೀಡಿದ್ದರು. ಈ ಬಗ್ಗೆ ಕಡಬ ಪೊಲೀಸರು ಎಫ್‌ಐಆರ್‌ ದಾಖಲಿಸಿ ತನಿಖೆ ನಡೆಸಿ ನ್ಯಾಯಾಲಯಕ್ಕೆ ಅಂತಿಮ ವರದಿ ಸಲ್ಲಿಸಿದ್ದರು. ನ್ಯಾಯಾಲಯ ಪ್ರಕರಣದ ತನಿಖೆಯನ್ನು ಕೈಗೆತ್ತಿಕೊಂಡು ಸುಮಾರು 13 ಸಾಕ್ಷಿಗಳ ಪೈಕಿ 12 ಸಾಕ್ಷಿಗಳನ್ನು ತನಿಖೆ ನಡೆಸಿತ್ತು. 10 ಪ್ರಾಸಿಕ್ಯೂಷನ್‌ ಪರ ದಾಖಲೆಗಳನ್ನು ಹಾಜರು ಪಡಿಸಲಾಗಿತ್ತು.
ಅಂತಿಮವಾಗಿ ವಾದ ಪ್ರತಿವಾದಗಳನ್ನು ಆಲಿಸಿದ ನ್ಯಾಯಾಧೀಶ ವೆಂಕಟೇಶ್‌ ಎನ್‌. ಅವರು ಪ್ರಾಸಿಕ್ಯೂಷನ್‌ ಈ ಪ್ರಕರಣವನ್ನು ಸಂಶಯಾತೀತವಾಗಿ ಸಾಬೀತುಪಡಿಸಲು ವಿಫಲಗೊಂಡಿದೆ ಎಂದು ತೀರ್ಮಾನಿಸಿ ಎಲ್ಲ ಆರೋಪಿಗಳನ್ನು ದೋಷಮುಕ್ತಗೊಳಿಸಿ ತೀರ್ಪು ನೀಡಿದ್ದಾರೆ. ಆರೋಪಿಗಳ ಪರ ವಕೀಲ ಮಹೇಶ್‌ ಕಜೆ ವಾದಿಸಿದ್ದರು.
