ಬೆಂಗಳೂರು : ಡಾ.ಶಿವರಾಜ್ಕುಮಾರ್ ಮೋಸ್ಟ್ ಎಕ್ಸ್ಪೆಕ್ಟೆಡ್ ‘ಭಜರಂಗಿ-2’ ಸಿನಿಮಾ ಮೇ 14ರಂದು ರಿಲೀಸ್ ಆಗಲಿದೆ. ಸದ್ಯ ಈ ಸಿನಿಮಾದ ಟೈಟಲ್ ಟ್ರ್ಯಾಕ್ ಬಿಡುಗಡೆಯಾಗಿದ್ದು, ಮತ್ತೊಮ್ಮೆ ಎ.ಹರ್ಷ ಸಿನಿಮಾದಲ್ಲಿ ಶಂಕರ್ ಮಹಾದೇವನ್ ಗಾಯನ ರಾರಾಜಿಸುತ್ತಿದೆ.
ಹೌದು.. ಈಗಾಗಲೇ ನಿರ್ದೇಶಕ ಎ.ಹರ್ಷ ಹಾಗೂ ಡಾ.ಶಿವರಾಜ್ಕುಮಾರ್ ಕಾಂಬಿನೇಷನ್ನ ‘ಭಜರಂಗಿ’, ‘ವಜ್ರಕಾಯ’ ಸಿನಿಮಾಗಳಲ್ಲಿ ಹಿಟ್ ಹಾಡಿಗೆ ಕಂಠದಾನ ಮಾಡಿದ್ದ ಶಂಕರ್ ಮಹಾದೇವನ್, ಮತ್ತೊಮ್ಮೆ ಆಂಜನೇಯನ ಹಾಡಿಗೆ ಧ್ವನಿಯಾಗಿದ್ದಾರೆ. ಇನ್ನು ‘ಭಜರಂಗಿ’, ‘ವಜ್ರಕಾಯ’ ಸಿನಿಮಾಗಳಿಗೆ ಸಂಗೀತ ನೀಡಿದ್ದ ಅರ್ಜುನ್ ಜನ್ಯಾ, ‘ಭಜರಂಗಿ-2’ ಚಿತ್ರದಲ್ಲೂ ತಮ್ಮ ಮ್ಯಾಜಿಕ್ ಮುಂದುವರೆಸಿದ್ದಾರೆ. ನಾಗೇಂದ್ರ ಪ್ರಸಾದ್ ಈ ಹಾಡಿಗೆ ಸಾಹಿತ್ಯ ರಚಿಸಿದ್ದು, ಈಗಾಗಲೇ ಸಂಗೀತ, ಸಾಹಿತ್ಯ ಹಾಗೂ ವೋಕಲ್ಸ್ಗೆ ಅಭಿಮಾನಿಗಳು ಸೈ ಅಂತಿದ್ದಾರೆ.
ಅದಾಗಲೇ ‘ಭಜರಂಗಿ-2’ ಸಿನಿಮಾದ ಪೋಸ್ಟರ್, ಟೀಸರ್ ಬಹಳಷ್ಟು ಸೌಂಡ್ ಮಾಡಿದ್ದು, ಇದೀಗ ರಿಲೀಸ್ ಆದ ಟೈಟಲ್ ಟ್ರ್ಯಾಕ್ ಅಭಿಮಾನಿಗಳ ಮೆಚ್ಚುಗೆಗೆ ಪಾತ್ರವಾಗ್ತಿದೆ. ಒಂದರ ಮೇಲೊಂದು ಸ್ಟಾರ್ ಸಿನಿಮಾಗಳು ರಿಲೀಸ್ ಆಗುತ್ತಿದ್ದಂತೆ, ಶಿವರಾಜ್ಕುಮಾರ್ ಚಿತ್ರಕ್ಕಾಗಿ ಎದುರು ನೋಡ್ತಿರುವ ಅಭಿಮಾನಿಗಳಿಗೆ ಈ ಹಾಡು ಇನ್ನಷ್ಟು ಕುತೂಹಲ ಹೆಚ್ಚಿಸಿದೆ. ಶಿವಣ್ಣನ ಜೊತೆ ಭಾವನಾ ಮೆನನ್ ನಟಿಸಿದ್ದು, ನಟಿ ಶ್ರುತಿ ಕೂಡ ಬಣ್ಣ ಹಚ್ಚಿದ್ದಾರೆ. ಸೌರವ್ ಲೋಕೇಶ್, ಚೆಲುವರಾಜು ‘ಭಜರಂಗಿ-2’ ಸಿನಿಮಾದ ಮುಖ್ಯ ಭೂಮಿಕೆಯಲ್ಲಿ ನಟಿಸಿದ್ದಾರೆ.
