ವಿಶ್ವ ಕ್ರಿಕೆಟ್ ಲೋಕದ ಒನ್ ಆಫ್ ದ ಗ್ರೇಟೆಸ್ಟ್ ಫಿನಿಷರ್, ಟೀಮ್ ಇಂಡಿಯಾ ಕಂಡ ಸಕ್ಸಸ್ಫುಲ್ ಕ್ಯಾಪ್ಟನ್, ಸಿಎಸ್ಕೆ ಅಭಿಮಾನಿಗಳ ಪಾಲಿನ ಥಲಾಗೆ ಇಂದು ಹುಟ್ಟುಹಬ್ಬದ ಸಂಭ್ರಮ. 40ನೇ ವಸಂತಕ್ಕೆ ಧೋನಿ ಕಾಲಿಟ್ಟ ಬೆನ್ನಲ್ಲೇ ವಾಟ್ ನೆಕ್ಸ್ಟ್ ಫಾರ್ ಧೋನಿ ಎಂಬ ಪ್ರಶ್ನೆಯೂ ಎದ್ದಿದೆ. ಹಾಗಾದ್ರೆ ಧೋನಿ ಮುಂದೇನು ಮಾಡ್ತಾರೆ..?
ಟೀಮ್ ಇಂಡಿಯಾ ಮಾಜಿ ನಾಯಕ ಎಮ್.ಎಸ್ ಧೋನಿಗೆ ಇಂದು ಹುಟ್ಟುಹಬ್ಬದ ಸಂಭ್ರಮ. ಅಭಿಮಾನಿಗಳ ನೆಚ್ಚಿನ ಮಿಸ್ಟರ್ ಕೂಲ್ ಇಂದು 40ನೇ ವಸಂತಕ್ಕೆ ಕಾಲಿಟ್ಟಿದ್ದಾರೆ. ಕಳೆದ ವರ್ಷ ಅಂತರಾಷ್ಟ್ರೀಯ ಕ್ರಿಕೆಟ್ಗೆ ಗುಡ್ ಬೈ ಹೇಳಿರುವ ಧೋನಿ ಸದ್ಯ ಸಕ್ರಿಯವಾಗಿರೋದು ಐಪಿಎಲ್ನಲ್ಲಿ ಮಾತ್ರ. ಐಪಿಎಲ್ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡ 2ನೇ ಸಕ್ಸಸ್ಫುಲ್ ತಂಡವಾಗಿ ಗುರುತಿಸಿಕೊಂಡಿದೆ ಅಂದ್ರೆ ಅದು ಧೋನಿಯ ಸಮರ್ಥ ನಾಯಕತ್ವದ ಬಲದಿಂದ. 8 ಬಾರಿ ಫೈನಲ್ ಪ್ರವೇಶ, ಅದರಲ್ಲಿ 3 ಬಾರಿ ಚಾಂಪಿಯನ್ ಪಟ್ಟ. ಧೋನಿ ಸಾಧನೆಗೆ ಇದೇ ಕನ್ನಡಿ.
ಈ ಕಾರಣದಿಂದಲೇ ಅಭಿಮಾನಿಗಳ ನೆಚ್ಚಿನ ಥಲಾ ಆಗಿ ಗುರುತಿಸಿಕೊಂಡಿರುವ ಧೋನಿ, ಇದೀಗ 40ನೇ ವಸಂತಕ್ಕೆ ಕಾಲಿಟ್ಟಿರೋದು ಸಂಭ್ರಮದೊಂದಿಗೆ ಅಭಿಮಾನಿಗಳಲ್ಲಿ ಆತಂಕವನ್ನೂ ಮೂಡಿಸಿದೆ.
2022ರಲ್ಲಿ ಯಶಸ್ವಿ ನಾಯಕನನ್ನ ರಿಟೈನ್ ಮಾಡಿಕೊಳ್ಳುತ್ತಾ CSK..?
14ನೇ ಆವೃತ್ತಿಯ ಉಳಿದ ಪಂದ್ಯಗಳ ಆಯೋಜನೆಯೊಂದಿಗೆ 15ನೇ ಆವೃತ್ತಿಯ ಟೂರ್ನಿಗೂ ಬಿಸಿಸಿಐ ಭರ್ಜರಿ ಸಿದ್ಧತೆ ನಡೆಸಿದೆ. ಮೆಗಾ ಆಕ್ಷನ್ಗೂ ಬ್ಲೂ ಪ್ರಿಂಟ್ ರೆಡಿ ಆಗಿದೆ. ಹೀಗಾಗಿ ಯಾವೆಲ್ಲಾ ಆಟಗಾರನನ್ನ ಫ್ರಾಂಚೈಸಿಗಳು ರಿಟೈನ್ ಮಾಡಿಕೊಳ್ಳಲಿವೆ ಅನ್ನೋದು ಹೆಚ್ಚು ಚರ್ಚೆಯಾಗ್ತಿದೆ. ಅದರಲ್ಲೂ 40 ವರ್ಷದ ಧೋನಿಗೆ ಸಿಎಸ್ಕೆ ಫ್ರಾಂಚೈಸಿ ಮತ್ತೆ ಮಣೆ ಹಾಕುತ್ತಾ ಅನ್ನೋದು ಹಾಟ್ ಟಾಪಿಕ್ ಆಗಿದೆ.
ಕಳೆದ ಆವೃತ್ತಿಯಲ್ಲಿ ಧೋನಿ ಪ್ರದರ್ಶನ
- ಪಂದ್ಯ 7
- ರನ್ 37
- ಸರಾಸರಿ 12.33
- ಸ್ಟ್ರೈಕ್ರೇಟ್ 123.33
ಧೋನಿ ತಂಡದಲ್ಲಿರ್ತಾರಾ ಅನ್ನೋ ಪ್ರಶ್ನೆಗೆ ಸಿಎಸ್ಕೆ ಫ್ರಾಂಚೈಸಿ ಸಿಇಒ ಕಾಶಿ ವಿಶ್ವನಾಥನ್ ಅವರ ಉತ್ತರ ಹೌದು ಅನ್ನೋದೇ ಆಗಿದೆ. ಆದ್ರೆ ಕಳೆದ ಆವೃತ್ತಿಯಲ್ಲಿ ನೀಡಿದ ಪ್ರದರ್ಶನ, ಧೋನಿ ಔಟ್ ಆಫ್ ಫಾರ್ಮ್ ಆಗಿದ್ದಾರೆ ಅನ್ನೋದನ್ನ ಸಾರಿ ಹೇಳ್ತಿದೆ. ಇದಲ್ಲದೇ ಮ್ಯಾಚ್ ಫಿಟ್ನೆಸ್ ವಿಚಾರದಲ್ಲೂ ಧೋನಿ ಹಿಂದುಳಿದಿದ್ದಾರೆ. ಇದೀಗ ಇನ್ನೊಂದು ವರ್ಷವೂ ಉರುಳಿದೆ. ಹೀಗಾಗಿ ಮಾಹಿಗೆ ಮತ್ತೆ ಸಿಎಸ್ಕೆ ಮಣೆ ಹಾಕುತ್ತಾ ಅನ್ನೋದು ಚರ್ಚೆಯಲ್ಲಿದೆ.
‘ಧೋನಿ ಚೆನ್ನೈ ಸೂಪರ್ ಕಿಂಗ್ಸ್ ತೊರೆಯುವುದಿಲ್ಲ. ಆತ ಆ ಫ್ರಾಂಚೈಸಿಯ ಮಹಾರಾಜ. ಆತ ಕೋಚ್ ಆಗಿ ಬದಲಾಗ್ತಾನೆ’’
-ಬ್ರಾಡ್ ಹಾಗ್, ಆಸಿಸ್ ಮಾಜಿ ಕ್ರಿಕೆಟಿಗ
ಧೋನಿ ಭವಿಷ್ಯದ ಬಗೆಗಿನ ಚರ್ಚೆ ಸದ್ಯ ಸೋಷಿಯಲ್ ಮೀಡಿಯಾಗಳಲ್ಲಿ ವ್ಯಾಪಕ ಚರ್ಚೆಯಾಗ್ತಿದೆ. ಈ ಅಖಾಡಕ್ಕೆ ಧುಮಿಕಿರುವ ಆಸಿಸ್ ಮಾಜಿ ಕ್ರಿಕೆಟಿಗ ಬ್ರಾಡ್ ಹಾಗ್, ಧೋನಿ ಮುಂದೆ ಕೋಚ್ ಆಗ್ತಾರೆ ಅಂತಾ ಪ್ರಿಡಿಕ್ಟ್ ಮಾಡಿದ್ದಾರೆ. ಧೋನಿ ಚೆನ್ನೈ ಫ್ರಾಂಚೈಸಿಯ ಮಹಾರಾಜ. ಅವರು ಕೋಚ್ ಆಗಿ ಬದಲಾಗಲಿದ್ದಾರೆ ಎಂದು ಹಾಗ್ ಅಭಿಪ್ರಾಯಪಟ್ಟಿದ್ದಾರೆ. ಇನ್ನೂ ಹಲವರು ಧೋನಿ ಚೆನ್ನೈನ ತಂಡ ಸಲಹೆಗಾರನಾಗಿರಲಿದ್ದಾರೆ ಎಂದು ಹೇಳ್ತಿದ್ದಾರೆ. ಆದ್ರೆ, ಧೋನಿ ಮುಂದಿನ ನಡೆಯನ್ನ ಪ್ರಿಡಿಕ್ಟ್ ಮಾಡೋದು ಅಷ್ಟು ಸುಲಭದ ವಿಚಾರವಲ್ಲ ಅನ್ನೋದಂತೂ ಸತ್ಯ.
