ನೆಲ್ಯಾಡಿ: ರಾಜ್ಯವನ್ನೇ ಬೆಚ್ಚಿಬೀಳಿಸಿರುವ ಬೆಂಗಳೂರಿನ ರಾಜಾಜಿನಗರ ಠಾಣೆ ವ್ಯಾಪ್ತಿಯಲ್ಲಿ ನಡೆದಿರುವ ಒಂದೇ ಕುಟುಂಬದ ಏಳು ಮಂದಿಯ ಸರಣಿ ಹತ್ಯೆ ಪ್ರಕರಣದ ಎರಡು ಮೃತದೇಹಗಳನ್ನು ಪೊಲೀಸರು ಶಿರಾಡಿ ಘಾಟ್‌ನಲ್ಲಿ ಪತ್ತೆ ಹಚ್ಚಿದ್ದಾರೆ.
ಶಿರಾಡಿ ಘಾಟ್‌ನಲ್ಲಿ ಪತ್ತೆಯಾದ ಮೃತದೇಹಗಳು ಕೊಲೆಯಾದ ಶಂಕರ್ ಹಾಗೂ ನಳಿನಿ ಅವರದ್ದು ಎಂದು ವರದಿಯಾಗಿದೆ. ಹಾಸನ ಜಿಲ್ಲೆ ಸಕಲೇಶಪುರ ತಾಲೂಕು ವ್ಯಾಪ್ತಿಗೆ ಬರುವ ಶಿರಾಡಿ ಘಾಟ್‌ನಲ್ಲಿ ಶಂಕರ್ ಹಾಗೂ ನಳಿನಿಯ ಮೃತದೇಹಗಳನ್ನು ಸಕಲೇಶಪುರ ಠಾಣೆ ಪೊಲೀಸರು ಪತ್ತೆ ಹಚ್ಚಿದ್ದರು. ಕೊಲೆ ಆರೋಪಿ ಇಂದುಶೇಖರ್ ನೀಡಿದ್ದ ಮಾಹಿತಿ ಆಧರಿಸಿ ಪೊಲೀಸರು ಶೋಧ ಕಾರ್ಯಾಚರಣೆ ನಡೆಸಿ ಮೃತದೇಹಗಳನ್ನು ಪತ್ತೆ ಹಚ್ಚಿದ್ದರು ಎಂದು ತಿಳಿದುಬಂದಿದೆ.
ಆರೋಪಿ ಇಂದುಶೇಖರ ಅ.14ರಿಂದ 20 ದಿನಗಳ ಅವಧಿಯಲ್ಲಿ ಪತ್ನಿ ಸೇರಿದಂತೆ 7 ಮಂದಿ ಸಂಬಂಧಿಕರನ್ನು ಭೀಕರವಾಗಿ ಕೊಲೆ ಮಾಡಿ ಮೃತದೇಹಗಳನ್ನು ಗೋಣಿಚೀಲದಲ್ಲಿ ತುಂಬಿ ಕಾರಿನಲ್ಲಿ ತೆಗೆದುಕೊಂಡು ಹೋಗಿ ನಂದಿ ಬೆಟ್ಟದ ತಪ್ಪಲು, ಸೇಡಂನ ಕಾಡು, ಚಾಮುಂಡಿ ಬೆಟ್ಟದ ತಪ್ಪಲು, ಶಿರಾಡಿ ಘಾಟ್ ನಲ್ಲಿ ಎಸೆದಿದ್ದ. ಇದೀಗ 7 ಮೃತದೇಹಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ.
