ದಾಖಲೆಗಳ ಮೇಲೆ ದಾಖಲೆಗಳನ್ನ ಬರೆಯುತ್ತಲೇ ಸಾಗುತ್ತಿರುವ ವಿರಾಟ್ ಕೊಹ್ಲಿ, ಸಮಕಾಲಿನ ಕ್ರಿಕೆಟ್ನಲ್ಲಿ ಶ್ರೇಷ್ಠ ಬ್ಯಾಟ್ಸ್ಮ್ಯಾನ್ ಪಟ್ಟವನ್ನ ಅಲಂಕರಿಸಿದ್ದಾರೆ. ಇತ್ತೀಚೆಗಷ್ಟೇ ಟಿ20 ಕ್ರಿಕೆಟ್ನಲ್ಲಿ 3000 ರನ್ ಗಳಿಸಿದ ವಿಶ್ವದ ಮೊದಲ ಆಟಗಾರ ಎನಿಸಿಕೊಂಡ ಕಿಂಗ್ ಕೊಹ್ಲಿ, ಇದೀಗ ಮತ್ತೊಂದು ಮೈಲ್ಸ್ಟೋನ್ ತಲುಪಿದ್ದಾರೆ. ರನ್ ಮಷೀನ್ ವಿರಾಟ್ ಕೊಹ್ಲಿ ರನ್ ದಾಹಕ್ಕೆ ಮಿತಿಯೇ ಇಲ್ಲ. 2019ರ ಆಗಸ್ಟ್ನಿಂದ ಕೊಹ್ಲಿ ಬ್ಯಾಟ್ನಿಂದ ಒಂದೇ ಒಂದು ಶತಕ ಕೂಡಾ ಸಿಡಿದಿಲ್ಲ. ಆದರೆ ಹೊಸ ದಾಖಲೆಗಳನ್ನ ಬರೆಯುವ ಅವರ ಓಟಕ್ಕೇನೂ ತಡೆ ಬಿದ್ದಿಲ್ಲ. ಕ್ರಿಕೆಟ್ ದಿಗ್ಗಜರನ್ನೇ ಹಿಂದಿಕ್ಕಿ ಮುನ್ನುಗ್ಗುತ್ತಿರುವ ಕೊಹ್ಲಿ, ಆಸಿಸ್ ಮತ್ತು ಇಂಗ್ಲೆಂಡ್ ಟೆಸ್ಟ್ ಸರಣಿಯಲ್ಲಿ ರನ್ ಬರ ಎದುರಿಸಿದ್ದರು. ಇದೀಗ ಫಾರ್ಮ್ಗೆ ಮರಳಿರುವ ವಿರಾಟ್, ಬೌಲರ್ಗಳನ್ನ ಬೆಂಡೆತ್ತುತ್ತಿದ್ದಾರೆ.
ಇತ್ತೀಚಿಗಷ್ಟೇ ನಡೆದ ಇಂಗ್ಲೆಂಡ್ ವಿರುದ್ಧದ 4ನೇ ಟಿ20 ಪಂದ್ಯದಲ್ಲಿ ಕೊಹ್ಲಿ, ಯಾರೂ ಮಾಡದ ದಾಖಲೆಯೊಂದನ್ನ ಮಾಡಿದ್ದರು. ಕೇವಲ 84 ಇನ್ನಿಂಗ್ಸ್ಗಳಲ್ಲಿ ವಿರಾಟ್ 3000 ರನ್ ಗಡಿ ದಾಟಿ T20 ಕ್ರಿಕೆಟ್ನಲ್ಲಿ ಇತಿಹಾಸ ಸೃಷ್ಠಿಸಿದ್ದರು. ಸದ್ಯ ಅಗ್ರೆಸ್ಸಿವ್ ವಿರಾಟ್ ಕೊಹ್ಲಿಯ ದಾಖಲೆಗಳ ಪಟ್ಟಿಗೆ ಮತ್ತೊಂದು ಸಾಧನೆ ಸೇರ್ಪಡೆಗೊಂಡಿದೆ. 253ನೇ ಏಕದಿನ ಪಂದ್ಯವನ್ನಾಡಿದ ಕೊಹ್ಲಿ, 3ನೇ ಕ್ರಮಾಂಕದಲ್ಲಿ ಬ್ಯಾಟ್ ಬೀಸಿ ಮತ್ತೊಂದು ಸಾಧನೆ ಮಾಡಿದ್ದಾರೆ.
3ನೇ ಕ್ರಮಾಂಕದಲ್ಲಿ 10 ಸಾವಿರ ರನ್ ಸರದಾರನಾದ ವಿರಾಟ್ : ಏಕದಿನ ಕ್ರಿಕೆಟ್ನಲ್ಲಿ 3ನೇ ಸ್ಲಾಟ್ನಲ್ಲಿ ಬ್ಯಾಟ್ ಬೀಸಿದ ಕೊಹ್ಲಿ, ಹತ್ತು ಸಾವಿರ ರನ್ ಬಾರಿಸಿದ ಸಾಧಕರ ಪಟ್ಟಿಗೆ ಎಂಟ್ರಿ ಕೊಟ್ಟಿದ್ದಾರೆ. ಆ ಮೂಲಕ ಕಿಂಗ್ ಕೊಹ್ಲಿ, ಈ ದಾಖಲೆ ಬರೆದ ವಿಶ್ವದ 2ನೇ ಆಟಗಾರ ಎನಿಸಿಕೊಂಡಿದ್ದಾರೆ.
3ನೇ ಕ್ರಮಾಂಕದಲ್ಲಿ ಬ್ಯಾಟ್ಸ್ಮ್ಯಾನ್ಗಳ ಸಾಧನೆ : 3ನೇ ಕ್ರಮಾಂಕದಲ್ಲಿ ಬ್ಯಾಟ್ ಬೀಸಿ ಹೆಚ್ಚು ರನ್ ಕಲೆ ಹಾಕಿದವರ ಪಟ್ಟಿಯಲ್ಲಿ, ಆಸ್ಟ್ರೇಲಿಯಾ ತಂಡದ ಮಾಜಿ ನಾಯಕ ರಿಕಿ ಪಾಂಟಿಂಗ್ ಮೊದಲಿಗರಾಗಿದ್ದಾರೆ. ಒಟ್ಟು 330 ಇನ್ನಿಂಗ್ಸ್ಗಳನ್ನ ಆಡಿರುವ ಪಾಂಟಿಂಗ್, 42ರ ಸರಾಸರಿಯಲ್ಲಿ 12,662 ರನ್ ಕಲೆಹಾಕಿದ್ದಾರೆ. 74 ಅರ್ಧಶತಕ ಮತ್ತು 29 ಶತಕಗಳನ್ನ ಪಂಟರ್ ಸಿಡಿಸಿದ್ದಾರೆ. 2ನೇ ಸ್ಥಾನದಲ್ಲಿರುವ ಕಿಂಗ್ ಕೊಹ್ಲಿ 190 ಇನ್ನಿಂಗ್ಸ್ಗಳಲ್ಲಿ 10,046 ರನ್ ದಾಖಲಿಸಿದ್ದಾರೆ. 63ರ ಸರಾಸರಿಯಲ್ಲಿ ಕೊಹ್ಲಿ 51 ಹಾಫ್ ಸೆಂಚುರಿ ಮತ್ತು 36 ಸೆಂಚುರಿಯನ್ನ ಬಾರಿಸಿದ್ದಾರೆ. ಇನ್ನು 3ನೇ ಸ್ಥಾನದಲ್ಲಿರೋ ಶ್ರೀಲಂಕಾ ಮಾಜಿ ವಿಕೆಟ್ ಕೀಪರ್ ಬ್ಯಾಟ್ಸ್ಮನ್ ಕುಮಾರ್ ಸಂಗಕ್ಕಾರ, ಈ ಸ್ಲಾಟ್ನಲ್ಲಿ 238 ಇನ್ನಿಂಗ್ಸ್ ಆಡಿದ್ದಾರೆ. 45ರ ಸರಾಸರಿಯಲ್ಲಿ 9,747 ರನ್ ಸಿಡಿಸಿರೋ ಸಂಗಕ್ಕಾರ 66 ಅರ್ಧಶತಕ ಮತ್ತು 18 ಶತಕಗಳನ್ನ ಸಿಡಿಸಿದ್ದಾರೆ.
ಇದಷ್ಟೇ ಅಲ್ಲ ಟೀಮ್ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ಏಕದಿನ ಕ್ರಿಕೆಟ್ನಲ್ಲಿ, ಮಗದೊಂದು ದಾಖಲೆಗೂ ಪಾತ್ರರಾಗಿದ್ದಾರೆ. ODI ಕ್ರಿಕೆಟ್ನಲ್ಲಿ ನಾಯಕನಾಗಿ ಹೆಚ್ಚು ರನ್ಗಳಿಸಿದ ಆಟಗಾರರ ಎಲೈಟ್ ಲಿಸ್ಟ್ನಲ್ಲಿ, 5ನೇ ಸ್ಥಾನಕ್ಕೇರಿದ್ದಾರೆ. ಗ್ರೇಮ್ ಸ್ಮಿತ್ ದಾಖಲೆ ಮುರಿದ ರನ್ ಮಷೀನ್ : ಸೌತ್ ಆಫ್ರಿಕಾ ಮಾಜಿ ನಾಯಕ ಗ್ರೇಮ್ ಸ್ಮಿತ್ರನ್ನ ವಿರಾಟ್ ಹಿಂದಿಕ್ಕಿ ಈ ಸಾಧನೆ ಮಾಡಿದ್ದಾರೆ. 8,497 ರನ್ ಗಳಿಸಿರೋ ರಿಕಿ ಪಾಂಟಿಂಗ್ ಮೊದಲ ಸ್ಥಾನದಲ್ಲಿದ್ರೆ, ಧೋನಿ 6,641 ರನ್ ಕಲೆಹಾಕಿ 2ನೇ ಸ್ಥಾನದಲ್ಲಿದ್ದಾರೆ. ಕಿವೀಸ್ನ ಸ್ಟೀಫನ್ ಫ್ಲೆಮಿಂಗ್ 6,295 ರನ್, ರಣತುಂಗ 5608 ರನ್ ಗಳಿಸಿ ಕ್ರಮವಾಗಿ 3 ಮತ್ತು 4ನೇ ಸ್ಥಾನದಲ್ಲಿದ್ದಾರೆ. 5,442 ರನ್ ಗಳಿಸಿರೋ ಕೊಹ್ಲಿ, 5416 ರನ್ ಗಳಿಸಿದ್ದ ಲೆಜೆಂಡ್ ಗ್ರೇಮ್ ಸ್ಮಿತ್ರ ದಾಖಲೆಯನ್ನ ಹಿಂದಿಕ್ಕಿದ್ದಾರೆ. ಇನ್ನು ಇತ್ತೀಚಿಗಷ್ಟೇ ಕೊಹ್ಲಿ ತವರಿನಲ್ಲಿ ಎಲ್ಲಾ ಮಾದರಿಯ ಕ್ರಿಕೆಟ್ನಲ್ಲಿ ವೇಗವಾಗಿ 10 ಸಾವಿರ ರನ್ ಗಳಿಸಿದ ಬ್ಯಾಟ್ಸ್ಮ್ಯಾನ್ ಎಂಬ ಮೈಲುಗಲ್ಲು ನಿರ್ಮಿಸಿದ್ದರು.
