ನವದೆಹಲಿ : ಈಗಿನ ಕಾಲದಲ್ಲಿ ಒಂದು ಮನೆಯಲ್ಲಿ 10, 20 ಜನರು ಇರೋದು ಅಪರೂಪ. ಅವಿಭಕ್ತ ಕುಟುಂಬದ ಮನೆಗಳು ಒಡೆದು ಹೋಳಾಗಿ ಹೋಗಿವೆ. ಇಂತಹ ಸಂದರ್ಭದಲ್ಲಿ ಒಂದೇ ಕುಟುಂಬದಲ್ಲಿ 1,200 ಜನರಿರೋದು ಆಶ್ಚರ್ಯಕ್ಕೆ ಕಾರಣವಾಗಿದೆ. ಅಸ್ಸಾಂನಲ್ಲಿರುವ ಈ ಫ್ಯಾಮಿಲಿ ದೇಶದ ಅತಿ ದೊಡ್ಡ ಕುಟುಂಬ ಅನ್ನೋ ಖ್ಯಾತಿಗೆ ಪಾತ್ರವಾಗಿದೆ.
ಲೋಕಸಭಾ ಚುನಾವಣೆಯ ಹೊತ್ತಿನಲ್ಲಿ ಅಸ್ಸಾಂನ ರಾನ್ ಬಹದ್ದೂರ್ ಥಾಪಾ ಕುಟುಂಬ ಮತ್ತೆ ಸುದ್ದಿಯಾಗಿದೆ. ಈ ಫ್ಯಾಮಿಲಿಯಲ್ಲಿ ಬರೋಬ್ಬರಿ 1,200 ಸದಸ್ಯರಿದ್ದು, ಈ ಬಾರಿ ಲೋಕಸಭಾ ಚುನಾವಣೆಗೆ 350 ಮಂದಿ ಮತದಾನಕ್ಕೆ ಅರ್ಹತೆ ಪಡೆದಿದ್ದಾರೆ. ಇದೇ ಏಪ್ರಿಲ್ 19ರಂದು ಅಸ್ಸಾಂನಲ್ಲಿ ನಡೆಯುವ ಮತದಾನದಲ್ಲಿ 350 ಮಂದಿ ತಮ್ಮ ನಾಗರಿಕ ಹಕ್ಕನ್ನು ಚಲಾಯಿಸುತ್ತಿದ್ದಾರೆ.
ದಿವಂಗತ ರಾನ್ ಬಹದ್ದೂರ್ ಥಾಪಾ ಅವರ ಅತಿ ದೊಡ್ಡ ಕುಟುಂಬ ಸದ್ಯ ಅಸ್ಸಾಂನ ಸೋನಿತ್ಪುರ ಜಿಲ್ಲೆಯಲ್ಲಿ ನೆಲೆಸಿದೆ. ರಾನ್ ಬಹದ್ದೂರ್ ಥಾಪಾ ಅವರಿಗೆ 5 ಹೆಂಡತಿಯರು. 12 ಮಂದಿ ಗಂಡು ಮಕ್ಕಳು, 9 ಹೆಣ್ಣು ಮಕ್ಕಳು ಇದ್ದರು. ರಾನ್ ಬಹದ್ದೂರ್ 150 ಮಂದಿ ಮೊಮ್ಮಕ್ಕಳನ್ನು ಹೊಂದಿದ್ದರು. ಇದೀಗ ಇವರ ಕುಟುಂಬ ಬೆಳೆದು 1200 ಸದಸ್ಯರವರೆಗೂ ತಲುಪಿದೆ.
ಸೋನಿತ್ಪುರ ಲೋಕಸಭಾ ಕ್ಷೇತ್ರದಲ್ಲಿ ಇದೇ ರೀತಿಯ ಹಲವು ಕುಟುಂಬಗಳು ವಾಸಿಸುತ್ತಿವೆ. ಅದರಲ್ಲೂ ರಾನ್ ಬಹದ್ದೂರ್ ಥಾಪಾ ಕುಟುಂಬ 350 ಮಂದಿ ಮತದಾನದ ಹಕ್ಕು ಪಡೆಯುವ ಮೂಲಕ ಇಡೀ ದೇಶದ ಗಮನ ಸೆಳೆದಿದೆ.